Pe’ vicarielle ’e Napule, poesia di Gianluigi Martone

Pe’ vicarielle ’e Napule

Si tu sapisse, quanti vvote

so’ passato ’a lloco…

pecché si chesti pprete putessero parlà,

dicessero nu sacco ’e verità.

Embè, ’a storia ’e sta città

sta scritta dinte ‘e vvene ’e chesti mura…

e si tu ce pienze,

io nun so’ nisciuno,

ma’me sento nu rrè.

Quanno cammino pe’ strade ’e Napule,

’E vvote nun me n’’addono,

me pare ’e sunnà cu’ l’uocchie apierte

cu ’o core arravugliato

’int’e cuperte ’e ll’ammore,

pecché tu hê sapè, ca io so’ figlio

’e ’sti mura fatte ’e storia,

canzone appassiunate, e malincunie.

Passa ’o tiempo, e comme passa,

ma Napule è sempe ’a stessa:

è bella, ricca ’e suonno e sentimente.

Napule te fa mbriacà ’e sole,

te fa nnammurà ’e mare,

te dà speranza, fantasia e nustalgia,

pecché ’a gente ’e sta città vive d’alleria.

Pirciò, astrignimmece tutte quante

comm’’a na vota, vulimmece bene,

pecchè Napule è bella, e nun more.

Gianluigi Martone